［玩輪員］都係吾友講嗰句，啲半桶水估中國爆煲，諗咩買中國CDS，問邊度有得賣，完全壞腦。我唔熟，佢熟，但我未問都估到要千萬（美金啦梗係）起跳。實際上吾友話你冇返一億嘅（美金啦梗係），蝕bid ask都蝕死你
細個睇咩福爾摩斯呀 金田一呀，梗係諗埋啲咩完美殺人計劃。到大啲發現根本唔使搞咁多嘢。越賣弄越易穿煲。N咁多連環殺手智慧罪犯都係不停再做案先畀人捉，其實係獨孤求敗，自己都想自己死。
記得回歸前澳門咩「濠江風雲」，崩牙駒連司警白德安架車都敢炸，完全腥風血雨。嗰時啲黑幫仇殺，邊使搞咁多嘢，當年又冇人臉辨識又乜，求其搵個蒙面人開架摩托去開槍掃，死咗冇仇報，點查？（順帶一提，崩牙駒後來就搞加密貨幣，足見打打殺殺冇前途）
咁你沽空中國，使乜搞咁多嘢。最簡單咪沽期指，亦有人沽澳洲紙（上篇講過）。沽澳洲紙未必直接派彩，但勝在外匯市場深度幾厚，百億百億咁做都針入海咁，而且亦都好難畀人發現，交易所亦好難改到規則—因為根本冇交易所。你沽期指乜鬼嘅，交易所可以改規則，要你申報持倉，甚至唔畀你買超過某個額。以前都試過，港交所既然de facto壟斷，政府又有高登些牙 quasi 同股不同權 ，pseudo 國企，更大機會配合主旋律。
散仔？沽期指玩熊證還好。走去做put輪嘅又係祝你好運。買個股輪更加賠得大（中的話）但死得更大（多數情況，否則輪后靠乜開飯？）
你睇呢隻新地輪，一日就輸八成。你要回本要贏返四倍。你問下你啲朋友有幾多次贏四倍？（有嘅，買馬買波咯，但買幾錢？）。寫文時半夜，你見到時星期四，新地應該回，隻輪應該升返⋯⋯幾成。多謝喎
當然實務上你可能唔使去到跌八成先走嘅。睇圖，兩點前仲有機會跳船。不過你有冇咁好彩捉到就你先知
Search